Биография

С.Керимова Азербайжан, урус ва лезги чIаларалди чапдай акъуднавай 10 агъзурдалай гзаф макъалайрин, очеркрин, корреспонденцийрин, зарисовкайрин, эссе ва фельетонрин автор я.

С.Керимова пуд чIалал – лезги, азербайджан ва урус чIаларал кхьизвай автор я. Адан икьван гагьди 40 ктаб чап хьанва. Гзаф эсерар урус, туьрк, ингилис, немс ва кумык чIалариз элкъуьрнава.

С.Керимовадин “Ван алачир гьарай” тIвар ганвай сад лагьай повестринни гьикаяйрин ктаб 1985-йисуз басма хьана ва ада автордиз кIелдайбурун патай чIехи гьуьрмет гъана. 1989-йисуз С.Керимовадин “Са гатфарин йиф” тIвар ганвай прозадин ктаб кIелдайбуру хушвилелди кьабулна. С.Керимовадин “Къариб къушран мани” тIвар ганвай шииррин ктаб 1991-йисуз басма хьана. Къелемэгьлиди 1993-йисуз Азербайжан чIалал кхьенвай “Алпаб” роман Азербайжандин прозада вакъиадиз элкъвена. Критикри и ктабдикай цIудралди рецензияр чапдай акъудна.

Автордин лезги чIалал сад лагьай ктаб “Лезгинкадал илига” тIвар алаз 1995-йисуз чапдай акъатна. 1998-йисуз ада лезги чIалалди “Къарагъ дуьнья, “Лезгинкадал” кьуьлериз” тIвар ганвай шиирринни поэмайрин ктаб чапдай акъудна.

Азербайжан чIалал кхьенвай повестрикайни романрикай ибарат тир “Рагъдан” (2000) кIватIалдини С.Керимовадиз сейливал гъана. Ктабдихъ авсиятда газетринни журналрин чинриз 54 рецензия акъатна.

С.Керимовадин кlелдайбурун гьуьрмет къазанмишнавай эсеррин арада “Къайи рагъ” (2003) «Лацу гъам», «Масадан тlал»

Ктабри кьетlен чка кьазва.  Адан аялар патал кхьенвай “Рагъ хъуьрезва” ва «Леян мани» ктабрикай Азербайжандин ва Дагъустандин лезги чlалан тарсар гузвай мектебра гегьеншдиз менфят къачузва. Эхиримжи йисара автордин къелемдикай азербайжан чlалал «Алпаб», «Севрен марф», лезги чlалал  «Чlалакай баллада», «Мад са гатфар», «Гьиссерин кимел», «Квахьай йикъарган» хьтин ктабар хкатнава.  Адан са кьадар повестарни романар “Блажная”, «Медвежий дождь», «Когда грустят горы» тlвараралди, гьакIни шиирарни поэмаяр “За семью горами” ва «Дум моих узоры» тlвараралди урус чIалал чапдай акъатнава.

С.Керимовадин 2011-йисуз басма хьайи “КцIар, кцIарвияр” энциклопедиядин кIватIал адан яргъал йисара чIугур зегьметдин нетижа я. Авторди тарихчиди, чIалан пешекарди, журналистди, таржумачиди, фотографди, гьакIни КцIар мукьувай чизвай ва адал рикI алай инсанди хьиз чIугунвай зегьмет чIехиди я. Ктабдин кьилин лайихлувилерикай сад ам кьве чIалалди хьун я.

2017-йисуз С.Керимовадин «Lezgiye» ктаб Туьркияда туьрк чlалал басма хьанва.

Гьа йисуз ада 500-далай гзаф лезги баядрин бинедаллаз чапдай акъудай 

 «Зи шаир халкь» ктабдиз Азербайжандин ИА-дин Фольклордин Институтди чlехи къимет гана. Институтди С.Керимовади лезги чlалай азербайжан чlалаз элкъуьрай гьа ктаб чапдай акъудна кlелдайбурув ва чlалан пешекаррив агакьарна.

Седакъет Керимова Муьзеффер Меликмамедовахъ галаз санал туькIуьрнавай «Лезги чIаланни азербайжан чIалан гафарган» ва "Азербайжан чIаланни лезги чIалан гафарган" ктабрин автор я.

ТIвар-ван авай кхьираг-журналист Муьзеффер Меликмамедова 2003-йисуз С.Керимовадин яратмишунриз талукьарнавай “Седакъет” тIвар ганвай публицистикадин ктаб чапдай акъудна. 2013-йисуз Азербайжан Республикадин Нобел Информациядин Меркездин регьбер, филологиядин илимрин кандидат Бейбала Алескерова «Седакъет Керимовадин уьмуьр ва яратмишунар» тIвар ганвай, азербайжан, лезги ва урус чIаларал туькIуьрнавай библиографиядин ктаб басма авуна. 2014-йисуз йисуз Азербайжандин Милли Ктабханади С.Керимовадин уьмуьрдизни яратмишунриз талукьарнавай «Седакъет Керимова» тIвар алай зурба са библиографиядин ктаб чапдай акъудна.

С.Керимова композитор хьизни сейли я. Ада 2016-йисуз вичи арадал гъана 20 йисуз датlана регьбервал гайи «Сувар» Лезги Манийринни Кьуьлерин Ансамблдин хъсан суракьар Азербайжандай яргъаризни сейли хьана. Ансамбль «Азербайжандин Халкьдин коллектив» гьуьрметдин тlварцlиз лайихлу хьана. С.Керимовади республикада сифте яз «Лезги кьуьлерин мектеб» арадиз гъана. Адан регьбервилик кваз ансамбльди 40-далай гзаф халкьдин манияр цlийи кьилелай туьхкlуьрна репертуардик кутуна. С.Керимовадин100-дав агакьна манийрин ч1аларни нотаяр адан "Зи манияр" ктабда гьатнава.

С.Керимова документальный ва художественный фильмрин сценарист ва режиссёр хьизни сейли я. Адан 100-далай гзаф документальный фильмар YouTube-da ава. Ада сценарист, продюсер ва композитор хьиз арадиз гъайи «Къайи рагъ» фильмдиз къедалди лезги, азербайжан ва урус чlаларал

YouTube-да 20 миллиондилай гзаф инсанри килигнава. С.Керимовадин «Квахьай йикъарган», «Ван алачир цlугъ» ва «Алпаб» фильмар эхиримжи йисара тамашачийрин рикl алай фильмриз элкъвенва.

Журналистикадин рекьяй къазанмишай агалкьунрай Седакъет Керимова Азербайжандин Журналистрин Союздин “Къизилдин къелем” (1984) ва Гьасанбег Зердабидин (1991) тIварунихъ галай премийриз лайихлу хьана.

2006-йисуз С.Керимовадиз “Азербайжандин медениятдин лайихлу кIвалахдар” гьуьрметдин тIвар гана.

2018-йисуз С.Керимова Дагъустан гьукуматдин "Хайи чилиз кьадарсуз муьгьуьббатдай" медалдиз, 2023-йисуз «Дагъустан Республикадиз къуллугъдай» ордендиз лайихлу хьана.